Kuvendi i Kosovës do të mbajë të hënën, më 19 tetor, mbledhjet e Komisionit për Integrim Evropian, Komisionit për Mbikëqyrjen e Agjencisë së Kosovës për Inteligjencë dhe Kryesisë së Kuvendit. Komisionet do të shqyrtojnë planet e tyre të punës për sesionin vjeshtor të vitit 2026, ndërsa Kryesia pritet të diskutojë propozimin e rendit të ditës për seancën e ardhshme plenare.
Komisioni për Integrim Evropian do të mblidhet në orën 10:00, në sallën N-303. Anëtarët do të shqyrtojnë dhe miratojnë rendin e ditës dhe procesverbalet e mbledhjeve të 2 dhe 6 tetorit 2026, si dhe Planin e Punës së Komisionit për sesionin vjeshtor. Në fund është paraparë pika “Të ndryshme”.
Në të njëjtën orë, në sallën N-302, do të mblidhet Komisioni për Mbikëqyrjen e Agjencisë së Kosovës për Inteligjencë. Përveç rendit të ditës dhe procesverbalit të mbledhjes së 1 tetorit, komisioni do të shqyrtojë dhe miratojë Projektligjin nr. 11/1-013, për ndryshimin dhe plotësimin e Ligjit nr. 10/L-001 për ndarjet buxhetore të Buxhetit të Republikës së Kosovës për vitin 2026. Në rend dite janë edhe plani i punës për sesionin vjeshtor dhe pika “Të ndryshme”.
Kryesia e Kuvendit do të mblidhet në orën 11:00, në sallën C-301. Ajo do të shqyrtojë miratimin e procesverbaleve të mbledhjeve të mëparshme dhe më pas do të diskutojë propozimin e rendit të ditës për seancën e ardhshme plenare. Ndër pikat e parapara për seancë janë miratimi i procesverbalit të seancës së mëparshme, deklarimet jashtë rendit të ditës dhe pyetjet parlamentare.
Në agjendë është përfshirë formimi i një komisioni ad hoc për përzgjedhjen e kandidatëve për katër anëtarë të Bordit të Radiotelevizionit të Kosovës (RTK): dy nga komuniteti shqiptar, një nga komuniteti serb dhe një nga komunitetet joshumicë. Kryesia do të shqyrtojë gjithashtu votimin e propozimit të Grupit Parlamentar të Listës Serbe për emërimin e deputetëve në komisionet parlamentare. Mbledhja do të përfshijë edhe shqyrtimin e propozimeve dhe kërkesave.