Kuvendi i Kosovës miraton në lexim të parë projektligjin për çmimet tavan

Kuvendi i Kosovës miratoi në lexim të parë Projektligjin për masat e përkohshme të produkteve themelore në raste të veçanta të destabilizimit në treg. Votimi u bë në një seancë të jashtëzakonshme të thirrur nga Lëvizja Vetëvendosje, me 63 deputetë pro, 19 kundër dhe pa asnjë abstenim.

Ministri i Financave, Hekuran Murati, e prezantoi projektligjin në emër të ministres së Tregtisë, Mimoza Kusari-Lila. Ai e cilësoi ligjin si përgjigje të shtetit ndaj nevojës për të mos mbetur spektator kur çmimet e produkteve bazë "dalin jashtë logjikës ekonomike dhe rëndojnë mbi familjet". Projektligji synon masa të përkohshme dhe proporcionale për mbrojtjen e konsumatorit, duke përfshirë caktimin e marzhës tregtare për shitje me shumicë dhe pakicë, si dhe çmimin maksimal të lejuar për produkte si buka, mielli, qumështi e vaji.

Murati theksoi se ligji nuk është kundër biznesit apo tregut të lirë, por instrument për rregull dhe përgjegjësi, që ndan fitimin e ligjshëm nga abuzimi në kriza. Ai parasheh krijimin e një Bordi të Pavarur për masat e përkohshme për rregullimin e çmimeve.

Lëvizja Vetëvendosje propozoi shqyrtimin e dytë të ligjit për datën 23 prill, dhe mocioni kaloi me shumicë votash. Në të njëjtën seancë është në rend dite edhe Projektligji për sigurimet shëndetësore.

Opozita kundërshtoi fort procedurën e përshpejtuar. Deputeti i Partisë Demokratike të Kosovës, Përparim Gruda, pyeti pse ligjet e rëndësishme shqyrtohen me urgjencë. Shefja e grupit parlamentar të Lidhjes Demokratike të Kosovës, Jehona Lushaku-Sadriu, akuzoi pushtetin se vepron për qëllime elektorale dhe shmang përgjegjësinë. Shefja e grupit të Vetëvendosjes, Arbërie Nagavci, shpjegoi se urgjenca lidhet me rëndësinë për qytetarët dhe mundësinë për kontribute të mëtejshme.