Kuvendi i Kosovës e miratoi të enjten, më 23 prill 2026, Projektligjin për masat e përkohshme të produkteve themelore në raste të veçanta të destabilizimit në treg. Votimi u bë me 63 vota për, asnjë kundër dhe asnjë abstenim, rreth një javë pasi kishte kaluar në leximin e parë. Për t’u bërë ligj, ai pret nënshkrimin e ushtrueses së detyrës së presidentit Albulena Haxhiu.
Opozita, e përbërë nga Partia Demokratike e Kosovës (PDK), Lidhja Demokratike e Kosovës (LDK) dhe Aleanca për Ardhmërinë e Kosovës (AAK), e kundërshtoi nismën duke e akuzuar Qeverinë e kryeministrit Albin Kurti për synim ndërhyrjeje në tregun e lirë. Deputeti i PDK-së Arben Mustafa theksoi se projekti ka “shumë paqartësi” dhe lë hapësirë për ndërhyrje. Opozita nuk e kundërshton idenë e çmimeve tavan, por mënyrën e përpilimit.
Qeveria i hodhi poshtë akuzat, duke argumentuar se ligji vendos masa të përkohshme dhe proporcionale vetëm në raste jashtëzakonshme çrregullimi të tregut, për mbrojtjen e qytetarëve nga rritje të paarsyeshme të çmimeve të produkteve bazë. Ministrja e Industrisë, Ndërmarrësisë, Tregtisë dhe Inovacionit Mimoza Kusari-Lila sqaroi se ligji aktivizohet vetëm në situata destabilizimi dhe zbatohet për 14 produkte të shportës bazë. Ai parashikon themelimin e një bordi me pesë anëtarë, organ më i lartë për çmimet tavan, i cili raporton Kuvendit çdo tre muaj.
Produktet themelore të përcaktuara
• Drithërat, mielli, buka, orizi, makaronat;
• Vaji ushqimor, qumështi dhe produktet e qumështit, uji;
• Pemët dhe perimet, kripën e kuzhinës, vezët e pulës, mishin;
• Sheqeri kristalor, ushqimet bazë për fëmijë;
• Produktet higjienike personale (sapuni, detergjenti, shamponi për flokë, letra tualeti, letrat higjienike, pasta, pelena);
• Lëndët e drurit për djegie.
Skënder Krasniqi, kryetar i Bordit të Dhomës së Tregtisë dhe Industrisë, bëri thirrje për transparencë në zbatim, lehtësim importi, rritje konkurrencëje dhe mbështetje për prodhuesit vendorë. Në të njëjtën seancë kaluan edhe projektligjet për sigurimet shëndetësore dhe shtetësinë.