Kuvendi i Kosovës miratoi në lexim të dytë Projektligjin nr.10/L-023 për Shtetësinë e Kosovës me 69 vota për, 2 kundër dhe pa abstenim. Votimi u zhvillua mes kundërshtimeve nga partitë opozitare.
Deputetja e Partisë Demokratike të Kosovës (PDK), Ganimete Musliu, e kritikoi projektligjin për procedura të përshpejtuara dhe mungesë respekti ndaj afateve ligjore. Ajo theksoi se ligji rrezikon sigurinë e brendshme të vendit dhe akuzoi mazhorancën se vepron sipas urdhrit të Dejona Aleksandër Mihalit. Musliu i bëri thirrje kryetares së Kuvendit, Albulena Haxhiu, ta lexojë mirë ligjin para nënshkrimit, duke pasur parasysh rolin e saj si ushtruese e detyrës së presidentes.
Albulena Haxhiu iu përgjigj duke thënë se deklarata e Musliut kishte treguar qëllimin e saj dhe nuk kishte nevojë të merrej më tej me çështjen.
Deputeti i Lëvizjes Vetëvendosje (LVV) dhe kryetari i Komisionit për Çështje të Sigurisë dhe Mbrojtjes, Mefail Bajqinovci, ftoi partitë ta mbështesin ligjin. Ai vlerësoi se lehtëson procedurat për rikthimin e shtetësisë nga mërgata dhe forcon lidhjen e qytetarëve me Republikën e Kosovës, sidomos për bashkëatdhetarët jashtë vendit. Bajqinovci propozoi gjithashtu një amendament nga komisioni i tij.
Kundërshtime patën edhe shefja e grupit parlamentar të Lidhjes Demokratike të Kosovës (LDK), Jehona Lushaku-Sadriu, dhe deputetja e Aleancës për Ardhmërinë e Kosovës (AAK), Albana Bytyqi.