Kuvendi i Kosovës miratoi të shtunën shqyrtimin e parë të projektligjit për energjinë me 58 vota për, 15 kundër dhe 1 abstenim.
Ministrja e Ekonomisë, Artane Rizvanolli, në prezantimin e projektligjit u bëri thirrje deputetëve ta votonin atë. Ajo e cilësoi si hap të rëndësishëm për modernizimin e sektorit energjetik dhe integrimin në tregun evropian. Sipas saj, ligji sjell qasje më të qartë dhe gjithëpërfshirëse, duke reflektuar nga Pakoja e Tretë e Energjisë drejt kërkesave të energjisë së pastër.
Deputeti i Partisë Demokratike të Kosovës, Ferat Shala, shprehu kritika për procedurën. Ai tha se ligji synon shmangien e llogaridhënies dhe përgjegjësisë së Kuvendit, duke e bartur te një ministri për pjesë të sektorit energjetik, të cilin e quajti jashtëzakonisht delikat. Shala përmendi trajtimin e KOSTT-së, që sipas tij kalon nga rregulla më të thjeshta te Ministria e Infrastrukturës. Ai nuk e kuptonte reformën në procedurë të përshpejtuar, pa debate me publikun, akterët profesionistë, shoqërinë civile e media.
Pas miratimit, mazhoranca dështoi të kalonte mocionin procedural për shqyrtim të përshpejtuar të projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme. Kryeparlamentarja Haxhiu mbylli seancën plenare.