Partia Demokratike zhvilloi këtë të shtunë Kuvendin Kombëtar, një ngjarje që pason rizgjedhjen e Sali Berishës në krye të kësaj force politike. Punimet e Kuvendit nisën me prezantimin e një figure digjitale të Gjergj Kastriotit-Skënderbeut, krijuar nga departamenti i inteligjencës artificiale të partisë.
Në fjalën e tij përballë të pranishmëve në Pallatin e Kongreseve, ish-kongresmeni republikan amerikan Bob McEwen vlerësoi kontributin e Partisë Demokratike në proceset demokratike dhe integrimin e Shqipërisë në NATO. Duke kujtuar vizitën e tij në Tiranë në shkurt të vitit 1991, ai e cilësoi rrëzimin e monumentit të diktatorit si një moment simbolik për lirinë. McEwen theksoi se vlera e luftës kundër sistemeve totalitare mbetet universale dhe shprehu mbështetjen e tij për opozitën shqiptare.
Gjatë seancës, u miratua komisioni që drejton punimet e Kuvendit, i cili përbëhet nga:
• Ivi Kaso (kryetar)
• Floriana Garo
• Bardh Spahia
• Eliona Shkreli
• Nada Meçorpaj