Kuvendi i Shqipërisë mblidhet sot, në orën 10:00, për një seancë plenare ku në rendin e ditës është parashikuar shqyrtimi i projektvendimit për caktimin e anëtarëve zëvendësues në komisionet e përhershme parlamentare. Përveç këtij projektvendimi, seanca do të përfshijë miratimin e procesverbalit të datës 23 korrik dhe dhënien e njoftimeve.
Paralelisht me zhvillimin e punimeve parlamentare, jashtë godinës është paralajmëruar një protestë qytetare. Për të garantuar sigurinë, forcat e policisë janë pozicionuar nga Ministria e Brendshme deri te pedonalja dhe zona pranë Xhamisë së Namazgjasë në "Rrugën e Elbasanit", ndërsa godina është rrethuar me gardh metalik.
Seanca e sotme pason një mbledhje të tensionuar të zhvilluar më 23 korrik, gjatë së cilës u regjistruan akte dhune dhe përplasje të forta. Tensionet nisën pas rrëzimit të kërkesës së Partisë Demokratike për zgjatjen e afatit të komisionit të posaçëm për reformën territoriale. Gjatë asaj seance, deputeti Gazment Bardhi u përjashtua pasi hodhi ujë në drejtim të kryeministrit Edi Rama. Opozita bllokoi foltoren për disa orë duke kërkuar dorëheqjen e kreut të qeverisë.
Në seancën e kaluar, mazhoranca miratoi 7 projektrezoluta të institucioneve kushtetuese, 2 akte normative dhe 15 projektligje. Mes akteve të miratuara ishte edhe një akt normativ për shpenzime prej 4.3 milionë eurosh në favor të këngëtarit Kanye West, votim në të cilin deputetët socialistë Erion Braçe dhe Elisa Spiropali nuk morën pjesë. Kuvendi ka planifikuar gjithashtu një tjetër seancë plenare për datën 30 korrik.
Përditësime
Kuvendi i Shqipërisë ka nisur seancën plenare nën masa të shtuara sigurie, ndërsa jashtë godinës protestuesit kanë kundërshtuar zhvillimet parlamentare me thirrjet 'Nuk na përfaqësoni, Parlament i krimit'. Në rendin e ditës, deputetët po shqyrtojnë projektvendimin për ndryshimin e vendimit nr. 87/2026, që rregullon procedurat për anëtarët zëvendësues në komisionet parlamentare.