Kuvendi i Shqipërisë ka nisur seancën plenare të kësaj të enjteje në një klimë të tensionuar, të karakterizuar nga prania e shtuar e forcave të rendit dhe zhvillimi i një proteste qytetare në afërsi të institucionit. Për të menaxhuar situatën, Policia e Shtetit ka instaluar gardhe metalike dhe ka dislokuar mjete speciale, përfshirë automjete me ujë, duke kufizuar qarkullimin në zonën përreth parlamentit.
Deputetët e Partisë Socialiste kanë mbërritur në ambientet e Kuvendit disa orë përpara nisjes së seancës. Gjatë hyrjes në institucion, është raportuar një incident ku disa protestues kanë hedhur miell drejt automjetit të kryetarit të Kuvendit, Niko Peleshi. Po ashtu, raportohet se forcat e rendit kanë ndaluar disa persona në zonën pranë parlamentit.
Axhenda e punimeve parlamentare parashikon:
- Interpelancë me ministrin e Turizmit, Kulturës dhe Sportit, Blendi Gonxhja, kërkuar nga deputetja Ina Zhupa.
- Seancë pyetje-përgjigje me ministrin e Drejtësisë, Toni Gogu, kërkuar nga deputeti Klevis Balliu.
- Shqyrtimin e projektligjeve për ratifikimin e marrëveshjes së garancisë me BERZH për OSHEE Group, ndryshimet në ligjin për administratën shtetërore dhe ndryshimet në ligjin për Shërbimin Informativ Kombëtar.
- Miratimin e projektrezolutës për vlerësimin e veprimtarisë së Komisionerit për Mbrojtjen nga Diskriminimi për vitin 2025.
Kjo seancë zhvillohet si vazhdimësi e një sërë protestash që kanë nisur prej 32 ditësh, gjatë të cilave qytetarët kanë kërkuar dorëheqjen e kryeministrit Edi Rama. Tubimi i sotëm pason thirrjet e bëra gjatë protestës së një dite më parë për të rrethuar institucionin e Kuvendit.