Kuvendi i Shqipërisë rrëzoi kërkesat e opozitës për ngritjen e komisioneve hetimore parlamentare për Autoritetin Rrugor Shqiptar (ARRSH) dhe Agjencinë Kombëtare të Shoqërisë së Informacionit (AKSHI).
Seanca maratonë, e cila zgjati 12 orë, përfundoi me miratimin e projektligjit për parandalimin e pastrimit të parave me 76 vota pro.
Partia Socialiste (PS) refuzoi kërkesën e grupit parlamentar PD-PL për komisionin hetimor në ARRSH, me 75 vota kundër dhe 28 pro. Ky komision do të shqyrtonte ligjshmërinë e veprimeve të ARRSH-së në investimet e infrastrukturës rrugore.
Kërkesa e PD-së për hetimin e AKSHI-t, e mbështetur nga 40 deputetë opozitarë, u rrëzua me 76 vota kundër dhe 28 pro. Kjo erdhi pas skandalesh dhe marrjes nën hetim të drejtuesve të lartë të këtij institucioni.