Grupi Parlamentar i Partisë Demokratike ka depozituar zyrtarisht në Gjykatën Kushtetuese kërkesën për shfuqizimin e vendimit të Kuvendit të Shqipërisë lidhur me refuzimin e ngritjes së dy komisioneve hetimore parlamentare. Kërkesa, e cila mban firmat e 46 deputetëve të opozitës, kundërshton vendimin e mazhorancës që bllokoi hetimin për kontratat e investimeve në infrastrukturën rrugore dhe kontrollin e ligjshmërisë së funksionimit të Agjencisë Kombëtare të Shoqërisë së Informacionit (AKSHI).
Në argumentimin e saj, opozita thekson se vendimi i Kuvendit për të mos ngritur komisionet përbën shkelje të dispozitave kushtetuese dhe cenon të drejtën e pakicës parlamentare për të ushtruar funksionin mbikëqyrës ndaj institucioneve shtetërore. Sipas Partisë Demokratike, komisionet hetimore janë mekanizëm thelbësor për garantimin e transparencës dhe llogaridhënies.
Kërkesa parashtron se mazhoranca ka penguar ushtrimin e kompetencave kushtetuese pa ofruar argumente shteruese për refuzimin e nismës. Për këto arsye, deputetët e opozitës i kërkojnë Gjykatës Kushtetuese zgjidhjen e mosmarrëveshjes së kompetencës mes deputetëve dhe Kuvendit, duke e shpallur vendimin e këtij të fundit si të papajtueshëm me Kushtetutën. Gjithashtu, pala kërkuese ka kërkuar përshpejtimin e procesit gjyqësor për shkak të rëndësisë së çështjeve që kërkojnë hetim parlamentar.