Grupi parlamentar i Partisë Demokratike vendosi të kërkojë ngritjen e një komisioni hetimor për kontrollin e ligjshmërisë në funksionimin e Agjencisë Kombëtare të Shoqërisë së Informacionit (AKSHI), si dhe për vlerësimin e sigurisë kibernetike dhe mbrojtjes së të dhënave personale. Kjo u bë e ditur nga kreu i grupit, Gazment Bardhi, pas mbledhjes së zhvilluar sot.
Sipas Bardhisë, komisioni do të analizojë në detaje funksionimin e AKSHI-së, duke përfshirë rreziqet për sigurinë kombëtare dhe detyrimet që rrjedhin nga anëtarësimi i Shqipërisë në NATO. Ai theksoi se kontrolli parlamentar është i domosdoshëm për garantimin e funksionimit demokratik të institucioneve dhe mbrojtjen e interesit publik.
Në një postim në Facebook, Bardhi apeloi mazhorancën të tregohet e përgjegjshme dhe të mos pengojë ngritjen e komisionit, duke e cilësuar këtë si e drejtë kushtetuese të opozitës. "Apelojmë mazhorancën të lejojë ushtrimin e kësaj përgjegjësie", u shpreh ai.