Kuvendi i Shqipërisë bëri publike të premten analizën e zbatimit të buxhetit për vitin 2025. Këto të dhëna tregojnë se përfitimet financiare që burojnë nga statusi i deputetit arritën në 200 milionë lekë, ose 44.2% të totalit të shpenzimeve operative.
Këto shpenzime përfshijnë rimbursime për shpenzime telefonike, karburant, dieta brenda vendit, honorare për pjesëmarrje në mbledhjet e komisioneve parlamentare dhe mbulim qiraje banimi për deputetët që nuk jetojnë në Tiranë. Ato konsiderohen përfitime shtesë mbi pagën bazë dhe sanksionohen në Statusin e Deputetit dhe vendimin e Kuvendit Për trajtimin e deputetëve.
Shpenzimet kryesore
66% e buxhetit të Kuvendit u shpenzua për pagat e deputetëve, stafit politik dhe të tjerëve, me pagat dhe kontributet shoqërore që arrijnë 1.2 miliardë lekë. Përbërja e burimeve njerëzore sipas numrit faktik për 2025 është:
- Deputetët: 32%
- Stafi politik: 14%
- Nëpunësit civilë: 44%
- Punonjësit mbështetës: 10%
Buxheti ndahet në dy programe: Veprimtaria legjislative, diplomacia dhe kontrolli parlamentar, që zë peshën më të madhe dhe përfshin udhëtimet jashtë shtetit, si dhe programi mbështetës Planifikimi, menaxhimi dhe administrimi.
Udhëtimet dhe shpenzimet operative
Shpenzimet për udhëtime jashtë shtetit, bileta, dieta dhe akomodim kushtuan 60 milionë lekë, një nëngrup i konsiderueshëm brenda shpenzimeve operative. Ndër shpenzimet e tjera operative:
- 11 milionë lekë për honorare ekspertëve të jashtëm në komisione hetimore ose të posaçme;
- 16 milionë lekë për ekzekutim vendimesh gjyqësore, mirëmbajtje sistemeve elektronike dhe pajisjeve;
- 49 milionë lekë për mirëmbajtje zyrash;
- 14 milionë lekë për pajisje;
- 28 milionë lekë për fatura uji dhe energjie, transport dhe materiale kancelarie.