Kuvendi i Shqipërisë zhvillon të enjten, më 2 prill, seancën e radhës plenare duke filluar në orën 10:00. Në këtë seancë pritet të zgjidhen anëtarët e Bordit të Autoritetit të Konkurrencës, si dhe një anëtare e Këshillit Drejtues të Autoritetit të Komunikimeve Elektronike dhe Postare (AKEP).
Propozimet për Bordin e Autoritetit të Konkurrencës vijnë nga Partia Socialiste dhe përfshijnë Denar Biba dhe Eldian Balla. Për Këshillin Drejtues të AKEP-it, me propozim të Këshillit të Ministrave, parashikohet zgjedhja e Diana Dervishi.
Në rendin e ditës janë parashikuar dy interpelanca. E para adresohet kryeministrit Edi Rama nga deputetja Jorida Tabaku dhe kërkon miratim me shumicë votash. E dyta drejtohet ministrin e Brendshëm Besfort Lamallari nga tre deputetë opozitarë: Klevis Balliu, Arjan Ndoja dhe Erald Kapri.
Seanca përfshin gjithashtu shqyrtimin e disa projektligjeve dhe projektvendimeve, mes të cilave:
- Projektligji "Për aderimin e Republikës së Shqipërisë në Traktatin e Singaporit mbi Ligjin e Markave Tregtare, bërë në Singapor, më 27 mars 2006";
- Projektligji "Për ratifikimin e vendimit nr. 1/2025 të Komitetit të Përbashkët, i krijuar nga marrëveshja e tregtisë së lirë ndërmjet Republikës së Shqipërisë dhe Republikës së Turqisë, për ndryshimin e marrëveshjes duke zëvendësuar protokollin II në lidhje me përcaktimin e konceptit të 'produkteve origjinuese' dhe metodat e bashkëpunimit administrativ";
- Projektligji "Për aderimin e Republikës së Shqipërisë në Traktatin e Najrobit për Mbrojtjen e Simbolit Olimpik, bërë në Najrobi, më 26 shtator 1981";
- Projektligji "Për disa shtesa dhe ndryshime në ligjin nr. 58/2022 'Për krijimin, organizimin dhe funksionimin e parqeve teknologjike dhe shkencore'";
- Projektligji "Për disa shtesa dhe ndryshime në ligjin nr. 34/2019, datë 17.06.2019, 'Për administrimin e pasurive të sekuestruara dhe të konfiskuara', të ndryshuar";
- Projektvendimi "Për një ndryshim në vendimin".