Besfort Lamallari, Ministër i Drejtësisë, prezantoi sot në Komisionin e Ligjeve të Kuvendit një paketë ndryshimesh në Kodin Penal. Ai e cilësoi këtë si reformë strategjike për forcimin e shtetit të së drejtës, rritjen e sigurisë publike dhe përmbushjen e detyrimeve në procesin e integrimit evropian.
Ministri theksoi se projektligji nuk është ndërhyrje thjesht teknike, por rezultat i analizës së problematikave reale në terren dhe harmonizimit me standardet e Bashkimit Evropian, në kuadër të Kapitullit 24 "Drejtësia, Liria dhe Siguria".
Harmonizimi me legjislacionin e BE-së
Ndryshimet përafrojnë legjislacionin penal shqiptar me shtatë instrumente kyçe të BE-së. Ato forcojnë luftën kundër pastrimit të parave, trafikimit të drogës dhe qenieve njerëzore, terrorizmit, shfrytëzimit seksual të fëmijëve dhe mbrojtjes së interesave financiare të BE-së. Paketa zgjeron juridiksionin penal të Shqipërisë për vepra të kryera jashtë territorit dhe rrit efektivitetin e ndjekjes penale për krime të rënda ndërkufitare.
Mbrojtja e fëmijëve dhe grupeve vulnerabël
Një vëmendje e veçantë i kushtohet mbrojtjes së fëmijëve përmes ashpërsimit të veprave penale me natyrë seksuale, rritjes së dënimeve, zgjatjes së afateve të parashkrimit dhe ndalimit të ushtrimit të profesioneve që përfshijnë kontakt me fëmijë. Gjithashtu, garantohet trajtimi i viktimave të mitura sipas standardeve më të larta të mbrojtjes.
Lufta kundër trafikimit të qenieve njerëzore
Projektligji parashikon zero tolerancë ndaj shfrytëzimit, duke përjashtuar pëlqimin e viktimës si element justifikues dhe duke kriminalizuar përdorimin e shërbimeve të ofruara nga viktimat e trafikimit.
Mbrojtja e territorit dhe interesit publik
Ndryshimet ashpërsojnë ndëshkimet për zënien e paligjshme të tokës, ndërtimet pa leje dhe shfrytëzimin e paligjshëm, veçanërisht në zona të mbrojtura, pasuri kulturore dhe infrastrukturë kritike. Mes ndryshimeve të tjera përmenden dekriminalizimi i shpifjes për gazetarët dhe kriminalizimi i parkimit në rresht të dytë.
Përditësime
Komisioni i Ligjeve miratoi paketën e ndryshimeve në Kodin Penal, të propozuar nga socialistët.
Ministrja e Drejtësisë Etilda Lamallari shpjegoi se ndryshimet dekriminalizojnë shpifjen për gazetarët që veprojnë në mirëbesim dhe interes publik, si dhe ashpërsojnë dënimet për dhunë, kërcënime dhe zjarrvënien.
Për miratimin në Kuvend kërkohen 84 vota, numër që mazhoranca e ka pa opozitën.