Kuvendi i Shqipërisë miratoi një paketë ndryshimesh në Kodin Penal, e cila u dekretua nga Presidenti i Republikës dhe u botua në Fletoren Zyrtare më 13 shkurt 2026. Këto ndryshime pritet të hyjnë në fuqi në fund të këtij muaji dhe përafrojnë legjislacionin shqiptar me direktivat e Bashkimit Evropian. Ato fusin sanksione të reja për krime të rënda dhe çështje që ndikojnë në jetën e përditshme.
Mbrojtja e të miturve
Ndryshimet parashikojnë dënime deri në 20 vjet burgim për akte seksuale me fëmijë nën 14 vjeç, veçanërisht kur autori është person me autoritet, anëtar i familjes ose fëmija ndodhet në kushte vulnerabël. Për herë të parë sanksionohet aksesimi i vetëdijshëm i materialeve pornografike me të mitur, si dhe organizimi i udhëtimeve për shfrytëzim seksual. Në rastet që çojnë në vdekje ose vetëvrasje të fëmijës, dënimi minimal është 20 vjet burgim.
Mbrojtja e gazetarëve
Reforma parashikon dekriminalizim të pjesshëm të shpifjes për gazetarët që përhapin me mirëbesim informacione për çështje me interes publik, me kusht që të kenë tentuar verifikimin e fakteve dhe të korrigjojnë pasaktësitë. Aktet e dhunës ose kanosjes ndaj gazetarëve për shkak të detyrës dënohen me deri në 5 vjet burgim.
Dënime për emergjencat dhe mjedisin
Ligji vendos dënime për parkimet që bllokojnë aksesin e emergjencave. Gjithashtu ashpërson dënimet për zjarrvënësit dhe fut masa për mbrojtjen e territorit dhe mjedisit.