Lamborghini ka anuluar prodhimin e modelit të saj të parë plotësisht elektrik Lanzador, i prezantuar si koncept në vitin 2023 me plane fillestare për lansim në vitin 2028. Në fund të vitit 2024, lansimi u shty në vitin 2029, ndërsa tani versioni elektrik është anuluar plotësisht.
Drejtori ekzekutiv Stephan Winkelmann deklaroi në një intervistë për gazetën The Sunday Times se interesi i klientëve për një supermakinë pa motor V8 ose V12 është "afër zeros". Ai e cilësoi investimin në automjete elektrike si një "hobi të shtrenjtë", që kërkon shpenzime të mëdha financiare me kthim të pakët, dhe financiarisht të papërgjegjshëm ndaj aksionarëve, klientëve e punonjësve.
Vendimi erdhi pas debateve të brendshme dhe konsultimeve me klientët si dhe tregtarët. Kompania, në pronësi të Audi, zgjodhi të mbyllë projektin e Lanzador elektrik në fund të vitit 2025.
Në vend të versionit elektrik, Lamborghini planifikon të lançoje një version hibrid plug-in me motor benzine deri në fund të dekadës. Po ashtu, modeli Urus i gjeneratës së ardhshme nuk do të jetë plotësisht elektrik, për të shmangur rrezikun e shitjeve të dobëta.
Kompania ka elektrifikuar tashmë gamën aktuale me hibride:
• Revuelto
• Urus SE
• Temerario
Winkelmann vlerësoi hibridet si zgjidhje që ofrojnë avantazhet e të dy botëve, duke ruajtur motorët konvencionalë sa më gjatë të jetë e mundur, në përputhje me kërkesat rregullatore dhe identitetin e markës.