Është lançuar këtë javë programi EU4Municipalities II, një nismë e mbështetur nga Bashkimi Europian që synon modernizimin e qeverisjes vendore dhe forcimin e rolit të bashkive shqiptare në procesin e integrimit europian.
Kryeministri Edi Rama, në podkastin "Flasim", u shpreh se programi lidhet drejtpërdrejtë me rritjen e kapaciteteve të pushtetit vendor. Ai nënvizoi se iniciativa ndihmon bashkitë të jenë më të përgatitura dhe konkurruese për të përfituar fonde nga Bashkimi Europian në të ardhmen.
Sipas prezantimit të projektit, EU4Municipalities II shërben si urë bashkëpunimi mes institucioneve europiane dhe bashkive shqiptare, duke përcjellë ekspertizë, njohuri dhe standarde europiane në nivel lokal.
Edi Rama deklaroi: "Java ka pasur edhe një tjetër moment me rëndësi për t’u shënuar, lançimin e programit EU4Municipalities II, Europa apo Bashkimi Europian për pushtetin vendor, faza e dytë, një program i mbështetur nga Bashkimi Europian, që lidhet drejtpërdrejtë me modernizimin e qeverisjes vendore, me forcimin e rolit të bashkive në procesin e anëtarësimit në Bashkimin Europian dhe me rritjen e kapaciteteve të tyre për t’u bërë më të gatshme që të jenë konkurruese në përpjekjen për të thithur më shumë nesër fonde nga Bashkimi Europian. Ky program bën pikërisht urën ndihmëse për të përcjellë më shumë dije nga Bashkimi Europian drejt bashkive tona, për të rritur vetëdijen e tyre për rolin që kanë në raport me Bashkimin Europian në një vend që nesër bëhet anëtar i Bashkimit Europian, dhe për këtë arsye unë besoj se ky program është një fakt që vjen në kohën e duhur si pjesë e tërësisë së fakteve që provojnë se Bashkimi Europian është gjithmonë e më pranë, se Shqipëria është gjithmonë e më shumë një vend që shihet si anëtar i Bashkimit Europian, jo në të ardhmen e largët, por në vitet që vijnë."