Ministri i Punëve të Brendshme, Ervin Demo, ka prezantuar sot ekipin e ri drejtues që do të mbikëqyrë zhvillimet dhe reformat në pushtetin vendor. Ky ekip do të përqendrohet në forcimin e kapaciteteve të bashkive dhe përmirësimin e shërbimeve për qytetarët. Në rolet kyçe janë emëruar Oltjon Muzaka, si zëvendësministër me përgjegjësi për çështjet e pushtetit vendor, dhe Anxhela Paparizo, e cila merr drejtimin e Agjencisë për Mbështetjen e Vetëqeverisjes Vendore. Paparizo ka drejtuar më herët QSUT-në.
Gjatë prezantimit, ministri Demo vlerësoi sfidat aktuale dhe kërkoi një standard të ri pune, duke theksuar nevojën për koordinim më të fortë dhe angazhim maksimal. Prioritetet strategjike të ndara me ekipin përfshijnë reformat në proces, përmbushjen e detyrimeve të Kapitullit 22 të negociatave me Bashkimin Europian, si dhe avancimin e digjitalizimit.
Sipas ministrit, synimi është krijimi i një pushteti vendor më modern dhe më të aftë për t'u shërbyer komuniteteve. Për këtë qëllim, është kërkuar zbatimi konkret në terren i programeve të zhvillimit, si Paketa e Maleve dhe Rilindja Urbane 2.0, me synimin për të gjeneruar mundësi të reja zhvillimi për zonat rurale dhe qytetet e vendit.