Një karrige e përmbysur dhe tabela me mbishkrimin “Sheshi u lirua” shënjuan mbylljen e protestës 108-ditëshe të lëvizjes Shqipëria Bëhet përballë Kryeministrisë.
Adriatik Lapaj, kreu i kësaj lëvizjeje, në një intervistë për A2CNN, sqaroi se protesta nuk ka mbaruar, por është ridimensionuar. “Është një ridimensionim. Protesta do të vijojë aty ku ka qenë, por edhe në çdo cep të Shqipërisë, aty ku kanë probleme qytetarët”, u shpreh ai.
Lapaj e konsideroi qëndresën me ditë e natë përballë zyrës së Edi Ramës si të frytshme. “Sot është fakt që kur ne e nisëm protestën, Belinda Balluku ishte ministre, sot është shkarkuar”, nënvizoi ai.
Sa i përket bashkëpunimit me forcat e tjera opozitare, Lapaj nuk dha përgjigje të qartë për zgjedhjet. “Drejtuesit duhet të dëgjojnë popullin. Shqipëria ka nevojë për ndryshim të madh sot. Ne do të marrim vendime shumë të matura. Unë nuk e kam tagrin për ta dhënë këtë përgjigje”, tha ai.
Ndërkaq, ai kërkoi bashkëpunim për protestat. Të gjithë faktorët kundër Ramës duhet të dalin me një qëndrim të përbashkët për Kodin Zgjedhor, sipas Lapajt.
Opozita vazhdon të kërkojë rrugë për t’u bashkuar, por partitë politike kanë ende ndasi.