Lara Colturi, skiatorja 19-vjeçare italo-shqiptare, përfaqëson Shqipërinë në Lojërat Olimpike Dimërore Milano-Cortina 2026, që zhvillohen nga 6 deri më 22 shkurt në Itali.
Transmetuesi britanik BBC i ka kushtuar një episod 30-minutësh podcast-it të tij “More than the Score” sportistes kuqezi, e cila ka tërhequr vëmendjen me paraqitjet në Kupën e Botës dhe katër podiumet në Botërorin e Skive në slalom. BBC e prezanton atë si njërën nga skiatoret më të mira, me shans për të shkruar historinë duke siguruar medaljen e parë olimpike dimërore për Shqipërinë.
Në emision janë ftuar ish-kampionia olimpike britanike Chemmy Alcott dhe gazetarja sportive Alesia Burnazi. Alcott vlerëson pjekurinë e Colturin në moshë të re dhe talentin e saj në garat botërore. Burnazi shpjegon impaktin e saj: “Shqipëria është një vend i vogël, me një traditë modeste në sportin e skive. Lara Colturi me talentin e saj është kthyer në një model për të rinjtë shqiptarë, të cilët një ditë aspirojnë që të kenë sukses në këtë disiplinë.” Prezantuesi është Ed Harry.
Vetë Colturi rrëfen se katër vite më parë zgjodhi skitë në vend të patinazhit artistik, ku ishte shumë e zonja. Ajo është rritur me nënën Daniela Ceccarelli, kampione olimpike dhe trajnere e saj. Katër sportistë shqiptarë marrin pjesë në këtë event.