Skiatorja Lara Colturi, me origjinë italiane, përfaqëson Shqipërinë në disiplinën e skive alpine dhe ka ndarë me Olympic Channel historinë e saj si dhe ambicien për të arritur podiumin në Lojërat Olimpike Dimërore Milano Cortina 2026.
Ajo vjen nga një familje me traditë sportive, si bijë e Daniela Ceccarelli, dy herë medaliste e artë olimpike. Colturi konsiderohet ndër garueset më premtuese në botën e skive.
Në lidhje me rrugën e saj sportive, Colturi e përshkruan përvojën si "e thjeshtë, argëtuese dhe e luftuar". Ajo nënvizon se suksesi kërkon punë të madhe dhe sakrifica: "Është e sigurt që duhet shumë punë dhe shumë sakrificë. Nevojitet të vazhdohet dhe të kërkohet për ta riprovuar dhe për ta rinisur edhe një herë nga e para". Për më tepër, ajo dëshiron të afirmohet si sportiste e pavarur, jo vetëm si "vajza e dikujt": "Unë dua të paraqes vajzën që jam, apo të paraqes 18-vjeçaren që jam". Stërvitjet e saj fillojnë çdo mëngjes, shpesh që në lindjen e diellit, për të përmirësuar formën dhe për të synuar rezultate të larta.
Sa i përket fillimeve, Daniela Ceccarelli tregon se vajza e saj "ka lindur në borë dhe në male". Colturi ka nisur skitë që në moshën dyvjeçare dhe kujton me emocion stërvitjet dhe garat e hershme: "Është një kohë e gjatë në borë e në akull… Më pëlqente kur më nxitnin: ‘Jepi dhe mos ki frikë.’ Janë emocione të papërshkruara". Familja ka pasur lidhje të ngushta me skitë: stërgjyshi i saj ka garuar në Olimpiadë, ndërsa e ëma fitoi medaljen e artë në Salt Lake City 2002.
Vendimi për të garuar për Shqipërinë, në vend të Italisë, erdhi natyrshëm falë mbështetjes së Federatës Shqiptare të Skive dhe kontributit të familjes në karrierën e saj ndërkombëtare, përfshirë suportin sportiv dhe financiar. Colturi shpjegon: "Unë kam pranuar të garoj për Shqipërinë sepse ne kemi qenë gjithnjë të bashkuar, dhe unë kam patur mbështetjen e nevojshme".