Gjatë ndeshjes kualifikuese për Ligën e Kampionëve midis klubit të Irlandës së Veriut, Larne FC, dhe ekipit serb FK Crvena Zvezda, në stadiumin Inver Park u shfaq një baner me përmbajtje politike, ku shkruhej “Kosova është Serbi”. Incidenti u evidentua gjatë pjesës së parë në tribunën McKay.
Nëpërmjet një komunikate zyrtare, Larne FC bëri të ditur se stafi i sigurisë ndërhyri menjëherë për të hequr banerin sapo e vuri re praninë e tij mbi tabelat reklamuese. Klubi theksoi se ky veprim nuk duhet të zbehë rëndësinë e ndeshjes, të cilën e përshkroi si një ngjarje historike për komunitetin vendas.
Sipas njoftimit, personi që vendosi flamurin ishte i pranishëm në sektorin vendas si vizitor neutral dhe nuk është tifoz i klubit Larne FC. Klubi ripohoi qëndrimin e tij se simbolet dhe shfaqjet me karakter politik nuk kanë vend në futboll dhe në stadiumet e tyre.
Përditësime
Klubi serb FK Crvena Zvezda ka publikuar në faqen e tij zyrtare një fotografi të një baneri me përmbajtje politike, shoqëruar me mbishkrimin 'Kosova është Serbi! Faleminderit Larne'. Veprimi u interpretua si përpjekje për ta paraqitur ndeshjen, e cila përfundoi me rezultatin 4-0 në favor të Crvena Zvezdës, si një akt mbështetjeje politike.