Ndeshja e Challenge Cup-it për volejboll femra midis klubeve Holte të Danimarkës dhe Crvena Zvezda të Serbisë u zhvillua më 8 janar 2026 në Danimarkë. Gjatë kësaj gare, u shfaqën mesazhe dhe simbole me përmbajtje politike dhe nacionaliste, duke përfshirë hartën e Republikës së Kosovës të paraqitur me ngjyrat e flamurit serb, si dhe mbishkrimin “nuk ka dorëzim”. Gjithashtu, u shpalosën banerë të tjerë që shfaqnin pretendime territoriale ndaj Kosovës.
Këto pamje kanë nxitur reagime, pasi bien ndesh me parimet e sportit që ndalojnë përdorimin e garave si platformë për mesazhe politike. Federata e Volejbollit e Kosovës (FVK) ka shprehur shqetësimin e saj zyrtar ndaj këtyre veprimeve.
Në reagimin e publikuar në faqen zyrtare, FVK thekson se shfaqja e tillë e mesazheve është e papranueshme dhe cenon vlerat e respektit, fair-play-t dhe ndarjes së sportit nga politika. Federata vlerëson se sporti duhet të shërbejë si urë midis popujve dhe jo si mjet për mesazhe që cenojnë sovranitetin territorial të shteteve.
Për këtë arsye, FVK i është drejtuar zyrtarisht Konfederatës Evropiane të Volejbollit (CEV), duke kërkuar trajtimin e rastit me seriozitet dhe marrjen e masave përkatëse ndaj përgjegjësve.