Federata e Futbollit e Kosovës (FFK), në bashkëpunim me sponsorin Albi Mall, ka vazhduar ndarjen e çmimit tradicional “Ylli i Javës”, i cili i jepet futbollistit më të dalluar të javës në Superligën e futbollit kosovar.
Për javën e 23-të të këtij edicioni, ky çmim i është ndarë futbollistit Laurent Xhylani të FC Malisheva. Ai u dallua në ndeshjen kundër FC Prishtina, ku shënoi dy gola në fitoren 3:0 të ekipit të tij.
Vlerësimin e ka bërë Komisioni i Veteranëve të Futbollit.
Pas marrjes së çmimit, Xhylani u shpreh i lumtur për vlerësimin. “Ka qenë një ndeshje e vështirë, të cilën e kemi përgatitur shumë mirë, duke i analizuar të gjitha pikat e forta dhe të dobëta të FC Prishtinës dhe në fund arritëm një fitore të rëndësishme. Në ekip kemi një atmosferë shumë të mirë, sidomos me ardhjen e stafit të trajnerëve. Vazhdojmë të kemi të njëjtin synim: daljen në Evropë apo titullin kampion. Jam shumë i gëzuar për këtë çmim, i falënderoj bashkëlojtarët e mi dhe këtë çmim ia dedikoj nënës sime”, tha ai për faqen zyrtare të FFK-së.