Lazoviq pranon mobilizimin serb më 1999, mohon pjesëmarrjen në Panorc

Në Gjykatën Themelore të Prishtinës u zhvillua seancë gjyqësore ndaj të akuzuarit Sërgjan Lazoviq për krime lufte në Panorc të Malishevës. Ngjarja ndodhi të martën, ku u administruan provat materiale dhe u dha mbrojtja nga i akuzuari, i cili deklaroi se nuk kishte marrë pjesë në ngjarjen e pretenduar.

Prokurori special Armend Zenelaj propozoi administrimin e provave materiale të listuara në aktakuzë, duke përfshirë dëshmi, raporte, ekspertiza forenzike, procesverbale dhe regjistrime në CD nga vendi i ngjarjes. Ai kundërshtoi administrimin e ekspertizës së dorëzuar nga mbrojtja e të akuzuarit.

Avokatja e mbrojtjes Feride Xani e kundërshtoi këtë propozim, duke theksuar se ekspertiza ishte punuar në mënyrë profesionale nga ekspertë të kualifikuar në këtë fushë. Trupi gjykues, i kryesuar nga gjyqtari Vesel Ismaili, miratoi propozimin e mbrojtjes për të administruar këtë ekspertizë.

Seanca vazhdoi me deklaratën e mbrojtjes së Sërgjan Lazoviq, i cili tha se kishte kryer shërbimin ushtarak në vitin 1995 në Prizren. Ai deklaroi se kishte qenë pjesëtar rezervë i ushtrisë së atëhershme dhe ishte mobilizuar kur filluan bombardimet e NATO-s më 24 mars 1999.

Lazoviq shpjegoi se, në kuadër të mbrojtjes popullore në Leposaviq, ishte ftuar të paraqitej në fshatin Vuça sipas renditjes së radhës. Si rezervë, ishin ftuar të gjithë personat e moshës madhore që kishin kryer shërbimin ushtarak. Ai u mobilizua përmes ftesës zyrtare dhe kaloi 7-8 ditët e para në fshatin Vuça, më pas u caktua në fshatin Zheronicë të Komunës së Zveçanit.

I akuzuari theksoi se ishte angazhuar vetëm gjatë vitit 1999, në kohën e bombardimeve, dhe se çdo mospërgjigje ndaj ftesës konsiderohej shkelje.