Shkrimtarja dhe akademikja Lea Ypi ka publikuar një analizë në gazetën ndërkombëtare The Guardian, ku shqyrton aktivizmin qytetar të nisur në Shqipëri para tetë ditësh. Protestat, të cilat kanë në fokus projektet e mundshme të zhvillimit në zona të mbrojtura si Zvërneci, janë vlerësuar nga Ypi si një shenjë e rëndësishme e ringjalljes së aktivizmit, pavarësisht sfidave strukturore.
Në shkrimin e saj, Ypi vëren se përderisa lëvizja është pa drejtues të qartë, ajo mbetet e vështirë për t'u kontrolluar, por njëkohësisht e brishtë ndaj infiltrimeve. Autorja thekson nevojën që këto protesta të kalojnë nga rezistenca në propozime konkrete, për të ruajtur unitetin politik.
Analiza ndalet te debati për investimet strategjike, ku përmendet propozimi i biznesmenit Jared Kushner për shndërrimin e zonave të mbrojtura në komplekse luksoze. Ypi krahason mikpritjen e këtyre investitorëve me politikat e ndjekura nga qeveria shqiptare ndaj emigrantëve, duke iu referuar qendrave të paraburgimit të ndërtuara në bashkëpunim me Italinë.
Qeveria shqiptare vijon të deklarojë se nuk është finalizuar asnjë marrëveshje për projektet e përfolura, ndonëse nuk e ka fshehur entuziazmin për mundësitë e investimeve të huaja. Sipas autores, situata aktuale e vendit, e karakterizuar nga largimi i mbi 1.2 milionë banorëve, nevoja për modernizim të bujqësisë dhe kriza në arsim, e ka lënë natyrën si një nga të paktat resurse për shitje në tregun global.