Kuvendi i Kosovës mblidhet sot në seancën konstituive, e cila nis në orën 17:00. Para seancës, Mimoza Kusari nga Lëvizja Vetëvendosje njoftoi se Albulena Haxhiu do të propozohet për t’u zgjedhur kryetare e Kuvendit. Kusari shtoi se vetë ajo do të jetë pjesë e kabinetit qeveritar, siç ishte propozuar edhe më parë.
Rendi i ditës së seancës
Seanca përfshin:
- Formimin e Komisionit të përkohshëm për verifikimin e kuorumit dhe mandateve të deputetëve;
- Betimin e deputetëve;
- Zgjedhjen e kryetarit të Kuvendit;
- Zgjedhjen e nënkryetarëve të Kuvendit.
Kryetari i Kuvendit propozohet nga grupi më i madh parlamentar dhe zgjidhet me shumicën e votave të të gjithë deputetëve. Tre nënkryetarë propozohen nga grupet më të mëdha parlamentare, ndërsa dy të tjerë nga komunitetet, njëri nga serbët dhe njëri nga të tjerët.
Procedura e zgjedhjes
Gjykata Kushtetuese ka dhënë të drejtë të pakufizuar Listës Serbe, si shumicë brenda komunitetit serb, për të propozuar kandidatin për nënkryetar të Kuvendit. Sipas Dimal Bashës, kryetarit të deritanishëm, partitë kanë arritur dakordim që votimi i nënkryetarëve të bëhet në pako.
Seancën konstituive e drejton deputeti më i vjetër në moshë, i ndihmuar nga më i riu në moshë. Në këtë seancë nuk zhvillohet debat.
Përditësime
Albulena Haxhiu nuk arriti të sigurojë votat në të gjitha 6 tentimet për kryetare të Kuvendit në legjislaturën e kaluar.
Zyrtarë të lartë të LVV-së thanë se pas konstituimit të Kuvendit do të thërrasin një seancë tjetër në mbrëmje për formimin e qeverisë.