Këshilli bashkiak i Lezhës miratoi me shumicë votash vendimin për përcaktimin e çmimeve të diferencuara për çadra dhe shezlongë në plazhet publike dhe private. Tarifa në plazhet publike fiksohet në 300 lekë (rreth 3 euro), ndërsa në ato private arrin deri në 2000 lekë (rreth 20 euro), sipas zonës dhe nivelit të shërbimit.
Kryetari i bashkisë, Pjerin Ndreu, shpjegoi se unifikimi i tarifave synon shmangien e abuzimeve të konstatuara në sezonet e mëparshme. Ai theksoi se vendimi vendos rregulla të qarta edhe për strukturat hoteliere që operojnë në vijën bregdetare.
Përfaqësuesit e opozitës në këshill i cilësuan tarifat të larta, duke argumentuar se ato mund të rëndojnë mbi buxhetin e pushuesve.
Autoritetet lokale bëjnë të ditur se 30% e hapësirës përgjatë vijës bregdetare të Shëngjinit dhe Talës mbetet pa pagesë. Kjo garanton akses për të gjithë qytetarët, përfshirë ata me mundësi ekonomike të kufizuara.