Ministri i Turizmit, Kulturës dhe Sportit, Blendi Gonxhja, pas mbledhjes së Qeverisë, ka shpjeguar risitë në menaxhimin e stacioneve të plazheve për këtë sezon turistik. Ai theksoi se po zbatohet një model i ri, ku njësitë e vetëqeverisjes vendore menaxhojnë një kategori plazhesh publike, duke ofruar shërbime të plota.
Sipas ministrit, tarifat prej 700 apo 1000 lekësh reflektojnë shpenzimet e domosdoshme për mirëmbajtjen e rërës dhe mbrojtjen e vijës bregdetare nga erozioni dhe ndikimi i detit gjatë dimrit. Gonxhja shpjegoi se kostot janë më të larta në zonat e jugut, siç është Ksamili, për shkak të specifikave të territorit dhe kërkesës së shtuar nga numri rekord i vizitorëve.
Ky model, krahas ruajtjes së plazheve të virgjëra, krijon një tipologji të plazheve publike të pajisura me të gjitha shërbimet. Ministria synon që përmes këtyre hapësirave të ushtrojë presion konkurrues ndaj operatorëve privatë, duke ndihmuar në mbajtjen e tavanit të çmimeve në treg.