Libri me përmbajtje ideologjike ruse shpërndahet në shkolla

Fondacioni "Bota ruse", i cili financohet nga Qeveria e Rusisë dhe është themeluar në vitin 2007 me dekret të presidentit Vladimir Putin, ka shpërndarë materiale mësimore në disa shtete, përfshirë Serbinë dhe Republikën Sërpska. Kjo nismë, e realizuar me mbështetjen e Ministrisë së Jashtme të Rusisë, ka sjellë në vëmendje përmbajtjen e librit "Për Rusinë dhe rusët".

Ky manual, i cili përdoret për mësimin e gjuhës ruse si gjuhë e huaj, përmban kapituj që pasqyrojnë narrativën zyrtare të Kremlinit. Libri, botimi i të cilit daton në vitin 2015, lavdëron politikën e jashtme të ndjekur nga Vladimir Putin pas vitit 1999, duke pretenduar forcimin e ekonomisë ruse dhe rritjen e standardit të jetesës. Gjithashtu, përmbajtja mbështet aneksimin e Krimesë.

Studiuesi Alexander Meienberger, autor i një vepre mbi veprimtarinë e fondacionit, ka vlerësuar se ky entitet, ndonëse paraqitet si promovues i kulturës, mbart një komponent të qartë ideologjik. Që nga fillimi i pushtimit rus të Ukrainës në vitin 2022, fondacioni është përfshirë në listën e sanksioneve të Bashkimit Evropian. Megjithatë, autoritetet në Serbi dhe në Republikën Sërpska kanë vazhduar bashkëpunimin me këtë fondacion.

Në fillim të korrikut, Shkolla Fillore “Isidora Sekuliq” në Shajkash, pranë Novi Sadit, njoftoi pranimin e një donacioni që përfshinte libra dhe laptopë. Ceremonitë e dorëzimit janë shoqëruar nga mbulim mediatik, siç është rasti i Radio-Televizionit të Vojvodinës. Ministritë përkatëse në Serbi dhe në Bosnjë dhe Hercegovinë nuk kanë dhënë sqarime nëse e konsiderojnë problematike përmbajtjen e këtij materiali mësimor, ndërsa fondacioni "Bota ruse" nuk iu është përgjigjur kërkesave për koment.

Ky donacion, sipas të dhënave të vetë fondacionit, përfshin pajisje dhe literaturë për dhjetëra shkolla në Serbi dhe 27 shkolla në Republikën Sërpska.