Udhëheqës nga e gjithë Evropa janë mbledhur sot në Jerevan të Armenisë për edicionin e tetë të Komunitetit Politik Evropian, një forum që bashkon rreth 50 krerë shtetesh dhe qeverish për të diskutuar sfidat kryesore të kontinentit.
Në këtë samit, Kosova përfaqësohet nga kryeministri në detyrë Albin Kurti, ndërsa Shqipëria nga kryeministri Edi Rama. Zyrtarisht, takimi trajton qëndrueshmërinë demokratike, kërcënimet hibride dhe sigurinë ekonomike, por diskutimet joformale pritet të përqendrohen te zhvillimet gjeopolitike dhe siguria energjetike.
Presidenti rumun Nicușor Dan ka theksuar si prioritet diskutimin për sigurinë energjetike, ndërsa kryeministri polak Donald Tusk ka nënvizuar rëndësinë e marrëdhënieve euro-amerikane, duke i cilësuar ato të pazëvendësueshme. Konflikti në Lindjen e Mesme pritet të jetë temë kyçe, duke marrë parasysh kufirin e Armenisë me Iranin, si dhe roli i presidentit amerikan Donald Trump dhe ndikimi i politikave të tij në Evropë.
Samiti shënon një moment të veçantë me pjesëmarrjen e kryeministrit kanadez Mark Carney, hera e parë që një lider jo-evropian i bashkohet këtij formati. Takimi bashkëkryesohet nga presidenti i Këshillit Evropian Antonio Costa dhe kryeministri armen Nikol Pashinyan, të cilët kanë theksuar rëndësinë e bashkëpunimit ndërkombëtar për paqen dhe stabilitetin global.