Pasi përshëndeti përfundimin e procesit zgjedhor dhe pjekurinë demokratike të treguar nga qytetarët, institucionet e sigurisë dhe akterët politikë, Lidhja e Bizneseve të Kosovës (LBK) ka kërkuar veprim të shpejtë për krijimin e organeve drejtuese të shtetit. Sipas kësaj organizate, Kosovës i duhen institucione funksionale, stabile dhe me mandat të plotë për të adresuar sfidat ekonomike.
Sipas vlerësimeve të LBK-së, çdo vonesë në formimin e institucioneve krijon pasiguri për sektorin privat, dëmton besimin e investitorëve dhe ngadalëson proceset integruese evropiane. Bizneset paralajmërojnë se zvarritja e këtij procesi mund të cenojë realizimin e projekteve strategjike dhe përpjekjet për rritjen e punësimit.
Në thirrjen e saj, LBK kërkon nga subjektet politike që të tejkalojnë dallimet partiake dhe të veprojnë me përgjegjësi shtetërore.
Komuniteti i biznesit pret:
- Stabilitet institucional dhe vendimmarrje efikase.
- Partneritet të fortë ndërmjet sektorit publik dhe atij privat.
- Përparësi për interesin e qytetarëve dhe zhvillimin ekonomik të vendit.