Gazeta amerikane New York Times ka publikuar një raportim mbi biznesmenët nga Katari, Moutaz dhe Ramez Al-Khayyat, të cilët kanë kërkuar mbështetjen e ish-presidentit të SHBA-së, Donald Trump, për të ndikuar në heqjen e sanksioneve ndaj Sirisë. Qëllimi i këtyre përpjekjeve ishte mundësimi i financimit ndërkombëtar për projekte zhvillimore në Siri, vlerësuar në mbi 12 miliardë dollarë, të fituara nga familja Al-Khayyat përmes kontratave qeveritare pas luftës civile.
Sipas shkrimit, biznesmenët zhvilluan komunikime me përfaqësues politikë amerikanë, përfshirë kongresmenin Xho Uillson, për të promovuar plane investimi në zonat bregdetare siriane. Planet përfshinin ndërtimin e porteve të kroçierave, klubeve të polos, sallave të ekspozimit për makina Bugatti dhe fushave të golfit. Heqja e sanksioneve të vendosura para rënies së regjimit të Bashar al-Assad në fund të vitit 2024 ishte një kusht thelbësor për bankat dhe investitorët e huaj.
Në Shqipëri, vëllezërit Al-Khayyat janë objekt i vëmendjes së autoriteteve të drejtësisë për shkak të investimit të planifikuar në Zvërnec. Prokuroria e Posaçme (SPAK) ka vendosur sekuestro preventive mbi llogaritë e kompanisë Albania Land Development, subjekt përmes të cilit vëllezërit realizuan blerjen e tokave në zonën e përmendur, duke ngritur pikëpyetje mbi ligjshmërinë e projektit.