Fatmir Limaj, kryetari i NISMËS Socialdemokrate, deklaroi se vendi rrezikon të futet në një cikël të vazhdueshëm zgjedhjesh nëse partitë politike vazhdojnë me të njëjtën qasje dhe logjikë veprimi.
Në emisionin Debat Plus, Limaj theksoi se zgjedhjet e mundshme të ardhshme nuk do të sjellin ndryshim real politik, por do të jenë vetëm një "rivotim". Ai u shpreh: "Duhet të shkohet në zgjedhje, shkoni sa herë të doni. Ne nuk mund ta ndalojmë këtë proces, ashtu si nuk e ndaluam në dhjetor. Do të ketë edhe në vjeshtë. Nëse vazhdojmë me të njëjtën logjikë veprimi, prapë do të ketë zgjedhje në vjeshtë. Për mua nuk ka zgjedhje, ka rivotim. Nuk janë këto zgjedhje, por rivotim për një kauzë që mobilizon masën dhe nxit votimin për arsye të caktuara."
Sipas tij, kjo situatë vjen pas zhvillimeve midis zgjedhjeve të fundit, ku një kauzë e re ka nxitur mobilizimin e votuesve. Limaj nuk e sheh si proces zgjedhor të vërtetë, por si përsëritje që nuk ndryshon përmbajtjen politike.