Në Repartin e Gjinekologjisë të Spitalit të Përgjithshëm “Dr. Sami Haxhibeqiri” në Mitrovicë, është realizuar me sukses një lindje natyrale e një foshnjeje me peshë prej 5.050 gramësh. Sipas njoftimit zyrtar të institucionit shëndetësor, foshnja ka pasur gjatësi prej 65 centimetrash, ndërsa përmasat e tjera të raportuara janë 65 me 57 centimetra.
Procesi i lindjes, i cili është vlerësuar si një rast i veçantë për spitalin, u krye nën përkujdesjen e mjekëve dr. Vjollca Çitaku dhe dr. Bajram Drevinja. Ekipi mjekësor që asistoi në këtë ndërhyrje përbëhej gjithashtu nga mamitë dhe infermieret Nazmije Gruda, Selvete Voca dhe Shengyl Xhaka.
Spitali i Përgjithshëm në Mitrovicë ka vlerësuar punën e personelit shëndetësor, duke e cilësuar këtë si një dëshmi të profesionalizmit të ekipit gjatë procesit të lindjes. Institucioni ka përcjellë urimet për nënën dhe familjen, duke i dëshiruar foshnjës shëndet dhe jetë të gjatë.