Njëzet e pesë qytetarët që u shoqëruan nga policia gjatë protestës së zhvilluar më 17 shtator përpara godinës së Kuvendit janë liruar nga qelia. Ndaj tyre do të vazhdojnë procedurat përkatëse ligjore, ndërsa ata do të hetohen në gjendje të lirë. Shoqërimet u realizuan në Komisariatin Nr. 1 të Tiranës, pas përplasjeve të regjistruara midis pjesëmarrësve në protestë dhe forcave të policisë, të cilat kishin ngritur një kordon sigurie për të penguar hyrjen e protestuesve në zonën e Parlamentit.
Tensionet ndodhën ndërkohë që brenda ambienteve të Kuvendit po zhvillohej seanca plenare, e cila kishte nisur në orën 10:00. Pjesë e shoqërimeve ishin edhe qytetarë që kishin shkuar në mbështetje të protestuesve, ndërsa midis të shoqërimeve është identifikuar edhe Dritan Goxhaj, i cili cilësohet si një prej organizatorëve. Protesta e djeshme, e cila shënon ditën e 110 të lëvizjes kundër qeverisë dhe klasës politike, u karakterizua nga thirrje të tilla si “nuk na përfaqësoni”. Më herët, gjatë ditës së shoqërimeve, një numër i konsiderueshëm qytetarësh u mblodhën para komisariatit në mbështetje të aktivistëve të ndaluar.