Katër punonjësit e policisë, të arrestuar nga Agjencia e Mbikëqyrjes Policore (AMP), janë lënë të lirë nga Gjykata e Shkallës së Parë e Juridiksionit të Përgjithshëm Shkodër. Në seancën për caktimin e masës së sigurisë, gjykata vendosi ndaj tyre "detyrim paraqitje" për veprën penale të "shpërdorimit të detyrës".
Efektivët e Njësisë së Sigurisë Kombëtare (FNSH), përkatësisht Dorjan Hasandoçaj, Gentian Xhanari, Dioniz Hotaj dhe Ridvan Zefi, po hetohen pasi nuk mbikëqyrën siç duhej Hasan Ferracakun. Ky i fundit, i cili po vuante masën "arrest në shtëpi", u largua nga banesa ku duhej të qëndronte nën ruajtje të vazhdueshme.
Ndaj Hasan Ferracakut është regjistruar një procedim i ri penal për "Largimi i të burgosurit nga vendi i qëndrimit". Ai është nën hetim për ngjarjen e rëndë të ndodhur në Velipojë në qershor të vitit 2021, ku pas një konflikti të armatosur humbën jetën: Kujtim Ferracaku, Edmond Gocaj, Xhovan Gocaj dhe Myzerim Zeneli. Nga ky incident mbetën të plagosur vetë Hasan Ferracaku dhe një i mitur.