Katër punonjës të policisë janë vënë në pranga nga Drejtoria Rajonale e AMP-së Shkodër-Lezhë, pasi dyshohet se kanë shpërdoruar detyrën lidhur me mbikëqyrjen e shtetasit Hasan Verracaku. Mungesa e këtij të fundit në banesë, ndonëse ndodhej nën masën e sigurisë “Arrest në shtëpi”, u konstatua pas verifikimeve nga specialistët e AMP-së.
Të arrestuarit, efektivë të Trupës Operacionale të Njësisë së Sigurisë Kombëtare Shkodër, akuzohen për veprën penale të “Shpërdorimit të detyrës”, parashikuar nga neni 248 i Kodit Penal. Ndërkohë, ndaj shtetasit Hasan Verracaku ka nisur procedimi penal për veprën “Largimi i të burgosurit nga vendi i qëndrimit”, sipas nenit 323 të Kodit Penal, pasi ai theu kushtet e masës së sigurisë.
Materialet hetimore i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, e cila do të drejtojë veprimet e mëtejshme procedurale. Në deklaratën e saj, AMP rikonfirmoi angazhimin për ruajtjen e ligjshmërisë dhe integritetit të institucioneve të sigurisë.
Përditësime
Autoritetet kanë korrigjuar mbiemrin e të dyshuarit kryesor për 'masakrën e Velipojës', nga Verracaku në Ferracaku. Burime zyrtare saktësuan se identiteti i tij i saktë është Hasan Ferracaku.