Agjencia e Mbikëqyrjes Policore (AMP), Drejtoria Rajonale Kukës-Dibër, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Dibër, ka arrestuar në flagrancë punonjësin e Policisë së Shtetit, Megin Gani Ademi, 32 vjeç, Specialist për Hetimin e Krimeve në Komisariatin e Policisë Dibër.
Efektivi dyshohet për veprën penale të "Shpërdorimit të detyrës", të parashikuar nga neni 248 i Kodit Penal. Arrestimi është kryer në prani të prokurorit të gatshëm, pas hetimeve që zbuluan se 32-vjeçari nuk ka ndërmarrë veprimet e nevojshme hetimore dhe procedurale pas largimit të shtetasit Amir Muaremi nga banesa ku ai vuante masën e sigurisë "arrest në shtëpi".
Shtetasi Amir Muaremi ishte në proces ekstradimi drejt Republikës Federale të Gjermanisë në momentin kur u largua nga banesa. Materialet procedurale i janë referuar Prokurorisë për hetime të mëtejshme. AMP njoftoi se mbetet e angazhuar për hetimin e çdo paligjshmërie në radhët e Policisë së Shtetit.