Fatos Lubonja foli në emisionin Studio 24 për zgjedhjen e Skënder Hitës, ish-drejtor i policisë për qarkun Fier, si kreu i ri i Policisë së Shtetit.
Ai theksoi se largimi i ish-drejtorit Ilir Proda nuk ndodhi për shkak të ngjarjes në Vilën 31 gjatë protestës së opozitës, por për lidhjen e tij me biznesmenin në kërkim Ergys Agasi. Lubonja deklaroi: «Pyetja që mund të ngrihet, pse u hoq Proda? Nuk besoj se u hoq për ngjarjen e Vilës. U hoq se del i lidhur me Agasin».
Lubonja vlerësoi se policia është e inkriminuar në mënyrë skandaloze. Ai shtoi se është e palogjikshme të mendohet se Edi Rama dhe bashkëpunëtorët e tij papritur kanë vendosur të zbatojnë demokraci. «E zgjodhën mes gjithë policëve? Ka qenë një komision. Ka burrë nënë që të besojë se ky komision vendos mbi disa kritere morale?!», tha ai.
Sipas Lubonjës, Rama nuk është një i pafajshëm që e kontrollon krimi, por sistemi është i inkriminuar, përfshirë policinë. Ai përfundoi se i gjithë sistemi është problem dhe pushteti ndodhet në krizë të vazhdueshme.