Zhvillimet në Lindjen e Mesme, pas luftës së nisur nga Shtetet e Bashkuara të Amerikës dhe Izraeli kundër Iranit, pritet të ndikojnë në ekonominë e Kosovës duke krijuar pasiguri, vlerëson Sytrime Dervisholli, eksperte e tregtisë.
Ajo pohon se efektet janë vërejtur menjëherë me rritjen e çmimit të karburanteve, veprim që e cilëson të panevojshëm. “Të gjitha kompanitë kanë rezerva të karburanteve dhe kanë pasur sinjale se në Lindjen e Mesme mund të ndodhë diçka”, thotë ajo në podkastin 5 pyetje të Radios Evropa e Lirë.
Sipas Dervishollit, nuk mund të parashikohet saktësisht se në cilët sektorë do të rriten çmimet në Kosovë si efekt zinxhir i rritjes globale. Rritja e çmimeve të produkteve do të ndikohet kryesisht nga shpenzimet më të larta në transportin e mallrave.
“Me mbylljen e Ngushticës së Hormuzit, kompanitë transportuese do të detyrohen të gjejnë rrugë të tjera për transportin e mallrave, të cilat kushtojnë më shumë dhe marrin më shumë kohë”, shpjegon ajo. I gjithë furnizimi i Kosovës me mallra varet nga transporti i kompanive të huaja.
Dervisholli konsideron se shteti duhet të rrisë inspektimin dhe të monitorojë ndryshimet e çmimeve në treg për të parandaluar keqpërdorimet. Podkastin 5 pyetje mund ta dëgjojnë në Apple Podcasts dhe Spotify.