Donald Trump, presidenti i Shteteve të Bashkuara, ka njoftuar se vendet që tregtojnë me Iranin do të përballen me një tarifë prej 25% në tregtinë me SHBA-në. Ky vendim vjen në kohën kur Irani po shtyp me forcë protestat antiqeveritare, në të cilat dyshohet se janë vrarë mijëra persona.
Kosova importon produkte nga Irani, por ekspertët dhe përfaqësuesit e bizneseve presin ndikim të parëndësishëm. Sipas të dhënave të Doganës së Kosovës, vlera e importeve nga Irani vitin e kaluar arriti në 17 milionë euro, ndërsa nuk u regjistruan eksporte. Kjo shifër gati është dyfishuar krahasuar me pesë vjet më parë.
Në Ministrinë e Industrisë, Ndërmarrësisë dhe Tregtisë (MINT) janë të regjistruara 23 biznese nga Irani: 5 aktive, 16 pasive dhe 2 të shuara. Radion Evropa e Lirë kërkoi shpjegime për veprimtarinë e tyre dhe pret përgjigje.
Lulzim Rafuna, kryetari i Odës Ekonomike të Kosovës (OEK), shprehet se politikat e Trumpit, veçanërisht sanksionet, nuk e godasin drejtpërdrejt ekonominë kosovare. "Eksportet dhe importet Kosovë-Iran janë të papërfillshme, nuk ka investime iraniane në Kosovë dhe nuk ka varësi energjetike apo financiare", thotë ai për Radion Evropa e Lirë.
Irani, me një popullsi prej mbi 91 milionë banorësh, nuk e njeh Kosovën si shtet dhe nuk ka marrëdhënie diplomatike zyrtare me të. Ekonomia e tij është dëmtuar nga keqmenaxhimi i financave publike, rënia e të ardhurave nga nafta dhe sanksionet ndërkombëtare, çka ka nxitur rritje çmimesh, dobësim të monedhës dhe protesta masive.