Avokati mbrojtës i Hashim Thaçit, Luka Misetic, i është kundërpërgjigjur publikisht Avokatit të Popullit të Dhomave të Specializuara të Kosovës (DHSK), Pietro Spera. Reagimi pasoi një njoftim të bërë nga Spera lidhur me punën e tij për mbikëqyrjen e hapësirave të paraburgimit dhe ofrimin e takimeve konfidenciale për të paraburgosurit.
Nëpërmjet një postimi në platformën “X”, Misetic kritikoi mungesën e komunikimit nga ana e institucionit që përfaqëson Spera. Sipas avokatit, përkundër mandatit të tij për të monitoruar dhe mbrojtur në mënyrë të pavarur të drejtat themelore të të akuzuarve, Spera nuk ka zhvilluar asnjë kontakt me ekipin mbrojtës të Hashim Thaçit gjatë periudhës 6-vjeçare.
Misetic bëri një krahasim me qasjen e Avokatit të Popullit të Republikës së Kosovës, Naim Qelaj. Ai theksoi se Qelaj ka treguar një interesim aktiv dhe ka mbajtur kontakte të vazhdueshme me mbrojtjen në kuadër të përpjekjeve të tij për monitorim.
Nga ana tjetër, Pietro Spera kishte deklaruar më herët se disa prej të paraburgosurve kanë pranuar takimet private dhe konfidenciale që ai ka ofruar, ndërsa disa të tjerë i kanë refuzuar ato.