Presidenti bjellorus Alexander Lukashenko ka deklaruar para gazetarëve në Astana se i ka kërkuar presidentit francez Emmanuel Macron të marrë përsipër udhëheqjen e përpjekjeve diplomatike për paqe mes Evropës, Rusisë dhe Bjellorusisë. Deklaratat vijnë pas një telefonate të zhvilluar mes dy liderëve më 24 maj.
Sipas Lukashenkos, ai e ka këshilluar Macronin të mos ia besojë rolin ndërmjetësues kryeministres italiane Giorgia Meloni. Duke iu referuar qeverisë së Romës, ai deklaroi: "Në Itali ka një grua si kryeministre. A doni vërtet t’ia lini këtë barrë një gruaje?". Përpos kësaj, lideri bjellorus e cilësoi kancelarin gjerman Friedrich Merz dhe kryeministrin britanik Keir Starmer si politikisht shumë të rinj për të marrë mbi vete një detyrë të tillë.
Gjatë prononcimit, Lukashenko bëri të ditur se e ka nxitur presidentin francez të zhvillojë një takim të drejtpërdrejtë me presidentin rus Vladimir Putin në Minsk. Lideri bjellorus iu drejtua Macronit si "aksakali" ose "i urti i fshatit", duke i kërkuar të marrë një rol më aktiv.
Lidhur me shqetësimet mbi sigurinë rajonale, presidenti bjellorus mohoi çdo synim për përfshirjen e vendit të tij në luftën në Ukrainë. Duke iu përgjigjur shqetësimeve të Macronit për një angazhim ushtarak bjellorus, ai deklaroi se nuk ka ndërmend të hyjë në luftë. Në lidhje me armët bërthamore të testuara së fundmi me Rusinë, Lukashenko përsëriti se ato do të shërbejnë vetëm për mbrojtje në rast agresioni.