Ky artikull është përditësuar. Shiko përditësimet
Komuna e Malishevës ka njoftuar më 10 janar 2026 se reshjet e mëdha të orëve të fundit kanë bërë që lumi Mirusha të dalë nga shtrati në disa pjesë, duke shkaktuar vështirësi në qarkullimin rrugor në territorin e saj.
Sipas njoftimit zyrtar, situata e përgjithshme është e menaxhueshme, ndërsa ekipet e Shërbimit të Zjarrfikësve dhe Shpëtimit, Policia e Kosovës, si dhe stafi komunal janë në gatishmëri të plotë për të ndihmuar qytetarët. Prurjet e mëdha të ujit kanë ndikuar në segmente rrugore specifike, ku kalimi bëhet me vështirësi:
• Rruga Hamdi Berisha në Malishevë
• Transiti afër lagjes Hoti
• Rruga Malishevë-Banjë
• Rruga Mirushë-Gurbardh
• Rruga Lubizhdë-Turjakë
• Ura në Lubizhdë
• Një urë në një lagje të fshatit Damanek
• Rruga drejt fshatit Panorc, me ujë në dy segmente
Furnizimi me energji elektrike po kryhet me reduktime në disa zona të qytetit, ndërsa furnizimi me ujë mbetet i rregullt, por uji nuk është i përdorshëm për pije për shkak të ndotjes nga vërshimet e mëparshme.
Ekipet përkatëse janë në terren për të sanuar vështirësitë. Komuna u bën thirrje qytetarëve të përdorin rrugë alternative, të shmangin rrugët e mësipërme dhe të respektojnë sinjalistikën e vendosur nga Policia e Kosovës për ndalim të qarkullimit.
Përditësim
Autoritetet lokale në Malishevë njoftuan se rruga afër Gjimnazit të Malishevës është e bllokuar plotësisht për qarkullim për shkak të përmbytjes nga lumi Mirusha, i cili ka dalë nga shtrati.