Ky artikull është përditësuar. Shiko përditësimet
Komuna e Malishevës raporton se të gjitha rrugët në territorin e saj janë të hapura për qarkullim, përkundër reshjeve të borës gjatë natës së kaluar. Kështu deklaroi kryetari Ekrem Kastrati, i cili vizitoi zonën e maleve të Berishës për të përcjellë punimet e mirëmbajtjes.
Komuna ka angazhuar kompanitë përgjegjëse për largimin e borës dhe hedhjen e kripës, duke siguruar qarkullim të lirë dhe të sigurt në të gjitha rrugët, përfshirë ato malore. Punimet zhvillohen pa pengesa, sipas njoftimit zyrtar. Kastrati shprehu kënaqësi për përkushtimin e kompanive dhe theksoi se qytetarët gëzojnë qarkullim të pandërprerë.
"Të gjitha rrugët në territorin e Komunës së Malishevës janë të hapura për qarkullim. Komuna ka angazhuar kompanitë përgjegjëse për mirëmbajtjen e rrugëve, të cilat po kryejnë punën e tyre me përkushtim. Sot, nga afër, kam përcjellë punimet në zonën e maleve të Berishës, për t’u siguruar që qytetarët të kenë qarkullim të sigurt dhe të pandërprerë", deklaroi Kastrati, duke shpërndarë një video nga vizita.
Autoritetet komunale u bëjnë thirrje vozitësve të pajisen me pajisje dimërore, siç parashihen me ligj, veçanërisht gjatë orëve të mbrëmjes për shkak të mundësisë së ngricave në rrugë.
Përditësim
Lumi Mirusha ka dalë nga shtrati për shkak të reshjeve të mëdha shiu, duke shkaktuar vështirësi në disa rrugë të Komunës së Malishevës. Rrugët e prekur përfshijnë 'Hamdi Berisha', transitin afër Hotit, Malishevë-Banjë, Mirushë-Gurbardh, Lubizhdë-Turjakë, si dhe ura në Lubizhdë e Damanek.
Ekipet e zjarrfikësve, policisë dhe stafit komunal janë në gatishmëri për të siguruar rrugët dhe sanuar dëmet. Furnizimi me energji elektrike regjistron reduktime në disa zona, ndërsa uji është i ndotur nga vërshimet dhe jo i përdorshëm.
Autoritetet këshillojnë përdorimin e rrugëve alternative dhe respektimin e sinjalistikës së policisë.