Arben Malaj, ish-ministër i Financave, në një lidhje direkte me studion e “Ditarit” të pasdites në A2CNN, të moderuar nga Pandi Gjata, shpalosi propozimet për masat që qeveria duhet të marrë kundër krizës së çmimeve nga rritja e çmimit të naftës.
Ai vlerësoi se vendi ndodhet në situatë kritike dhe është prekur thellë nga kjo rritje. Sipas tij, katër grupe kërkojnë mbështetje të menjëhershme:
- shtresat në nevojë;
- pensionistët;
- përfituesit e ndihmës sociale;
- bujqësia.
Malaj theksoi se Shqipëria është i vetmi vend evropian që nuk ka prezantuar një paketë sociale. Ai kritikoi strukturat e kontrollit, të cilat krijojnë më tepër premisa për korrupsion sesa ndihmojnë qytetarët.
Si masë të parë, ai sugjeroi që qeveria dhe Ministria e Financës të bëjnë inventarin komplet të rezervës së sigurisë. Sipas tij, ekziston ligj për rezervën, por ka pasur raste kur ajo është shitur dhe kompanitë kanë marrë fitime abuzive në mënyrë informale. Qeveria nuk ka kryer asnjë verifikim.
Si masë të dytë, ai propozoi tatimin e fitimeve abuzive, siç bën qeveria e Greqisë, ku të ardhurat shkojnë në buxhet për solidaritet social. Ai përmendi modelet e Greqisë dhe Kroacisë. Malaj vuri në dukje se qeveria ka bllokuar monopatinat e transportit publik, ndërkohë që vendi ndodhet në kulmin e krizës së naftës, ku njerëzit mund të shkonin në punë me këto mjete.
Ai paralajmëroi se krizat e naftës janë të përsëritura dhe masat duhet të jenë të gatshme, pa pritur uljen e çmimeve. Sipas tij, kjo është konflikt ekonomik, jo ushtarak, me Kinën në qendër dhe me ndërthurje të shumta. Edhe nëse lufta mbaron sot, çmimet do të ulen pas një muaji.