Ministri i Financave Petrit Malaj prezantoi më 7 maj në Kuvend Aktin Normativ për ndryshime në ligjin "Për akcizat në Republikën e Shqipërisë". Ky akt parashikon ulje me 20% të akcizës për naftën kur çmimi i shitjes me pakicë, i përcaktuar nga Bordi i Transparencës, tejkalon 220 lekë/litrë, dhe për benzinën mbi 200 lekë/litrë.
Sipas Malaj, masa është aplikuar vetëm në dy raste. Ulja e akcizës sjell reduktim nga 39,37 lekë/litrë në 31,5 lekë/litrë, ose rreth 7,8 lekë/litrë. Kjo ndikon gjithashtu në uljen e TVSH-së me 1,58 lekë/litrë gjatë importimit, duke arritur lehtësim total prej 9,45 lekë/litrë për konsumatorin.
Efekti financiar llogaritet në rreth 37 milionë lekë të ardhura të munguara nga akciza, një kosto e përballueshme për buxhetin. Ministri theksoi se masat janë në linjë me praktikat europiane dhe rajonale, për mbrojtjen e qytetarëve nga luhatjet e çmimeve globale.
Akti Normativ lidhet me konfliktin në Lindjen e Mesme, i cili ka ndikuar në ekonominë shqiptare. Qeveria shpalli situatë të veçantë në tregun e hidrokarbureve dhe aktivizoi Bordin e Transparencës. Deri tani, bordi ka zhvilluar 16 mbledhje dhe janë kryer 66 kontrole të përbashkëta nga administratat tatimore dhe doganore, ku janë konstatuar shkelje.
Malaj nënvizoi financat publike të shëndosha, që krijojnë hapësirë për politika sociale dhe përballimin e sfidave të mundshme nëse kriza përshkallëzohet.