Administrata Doganore e Malit të Zi ka parandaluar transitin e 3 kontejnerëve me mish të ngrirë viçi me origjinë nga Brazili, të cilët ishin të destinuar për një kompani në Kosovë me inicialet A. SHPK. Sipas njoftimeve zyrtare, malli ishte hequr nga mbikëqyrja doganore pa autorizimin e autoriteteve përkatëse në Portin e Tivarit.
Gjatë një inspektimi në një objekt magazinimi frigoriferik, autoritetet gjetën prova për veprimtari të paligjshme. Punonjës të angazhuar nga subjekti kosovar dyshohet se kanë përdorur mjete të posaçme për të hequr deklaratat origjinale, të cilat tregonin se afati i përdorimit kishte skaduar, dhe i kanë zëvendësuar ato me etiketa të falsifikuara me afat të ri përdorimi.
Në lidhje me këtë incident, Administrata Doganore ka njoftuar Administratën për Sigurinë e Ushqimit, Çështjet Veterinare dhe Fitosanitare, si dhe Administratën e Policisë të Malit të Zi. Këto institucione janë përfshirë në procedurat hetimore për të zbardhur rastin. Autoritetet po verifikojnë gjithashtu nëse kompania në fjalë ka furnizuar me produkte të ngjashme edhe subjekte të tjera që merren me përpunimin e mishit brenda territorit të Malit të Zi.
Në Kosovë, institucionet përgjegjëse, përfshirë Doganën e Kosovës, Agjencinë e Ushqimit dhe Veterinarisë dhe Ministrinë e Bujqësisë, nuk kanë ofruar ende përgjigje zyrtare lidhur me këtë rast apo masat e mundshme ndaj blerësit të identifikuar.