Ekipi i Malishevës vazhdon rrugëtimin në garat evropiane, ku pasditen e sotme përballet me skuadrën skoceze Hibernian. Ndeshja e parë e raundit të dytë kualifikues të Ligës së Konferencës do të zhvillohet në stadiumin "Fadil Vokrri" në Prishtinë, duke filluar nga ora 16:30.
Trajneri i Malishevës, Thomas Brdariq, theksoi rëndësinë e përqendrimit në këtë përballje, duke vlerësuar kundërshtarin si një ekip fizikisht të fortë dhe me lojtarë të shpejtë. Përkundër përvojës së madhe ndërkombëtare të skocezëve, tekniku gjerman shprehu besim se lojtarët e tij mund të përsërisin suksesin e raundit të parë. Malisheva siguroi kualifikimin në këtë fazë pas fitores me rezultat të përgjithshëm 6:2 kundër Vllaznisë së Shkodrës, duke arritur kështu kualifikimin e parë evropian në historinë e klubit.
Nga ana tjetër, Hibernian konsiderohet si një nga klubet tradicionale të futbollit në Skoci dhe kjo sfidë shënon nisjen e sezonit të tyre evropian. Fituesi i kësaj dysheje do të sigurojë kalimin në raundin e tretë kualifikues të kompeticionit.